ទូត​អាមេរិក​ណែនាំ​អាហារូបករណ៍​នៅ​សាលា​យោធា​ជាច្រើន​កន្លែង​ដល់​យុវជន​កម្ពុជា

សហរដ្ឋអាមេរិក​បាន​ប្រកាស​បើកឱកាស​ដល់​យុវជន​កម្ពុជា អាច​ចូលរួម​ក្នុងការ​ប្រកួតប្រជែង​ដើម្បី​ទទួលបាន​សិទ្ធិ​ក្នុងការ​ចូលរៀន​នៅក្នុង​សាកលវិទ្យាល័យ​យោធា​ដ៏ល្បីៗ នៅ​សហរដ្ឋអាមេរិក ដែលមាន​ដូចជា សាកលវិទ្យាល័យ US Military Academy West point សាកលវិទ្យាល័យ​the Naval Academyសាកលវិទ្យាល័យ Air Force Academy និង សាកលវិទ្យាល័យ the Coast Guard Academy។

យោងតាម​សេចក្ដីប្រកាស​ព័ត៌មាន​នៅក្នុង​ទំព័រ​ហ្វេ​ស​ប៊ុ​ក របស់​ស្ថានទូត​អាមេរិក​ប្រចាំ​ប្រទេស​កម្ពុជា បេក្ខជន​ដែល​ចង់​ចូលរួម​ប្រកួតប្រជែង យក​សិទ្ធិ​ទៅ​រៀន​នៅ​សាលា​យោធា​អាមេរិក​ត្រូវមាន​កាយសម្បទា​ល្អ​ចេះ​ភាសា​អង់គ្លេស​ស្ទាត់ជំនាញ​មិនទាន់​រៀបការ​និង​មាន​ឆន្ទៈ​ក្នុង​ការបម្រើ​ជា​យោធា​នៅក្នុង​ប្រទេស​កម្ពុជា និង​ជា​យុវជន​កម្ពុជា ដែលមាន​អាយុ​ចន្លោះ​ពី ១៧ដល់២១ ឆ្នាំ។

សេចក្ដីជូនដំណឹង​ដដែល​ក៏បាន​ឲ្យ​ដឹងថា សិស្ស​ដែល​ទទួលបាន​សិទ្ធិ​នេះ នឹង​ទទួល​បានការ​ការអប់រំ​និង​ការបណ្តុះបណ្តាល​ភាពជា​អ្នកដឹកនាំ លំដាប់​ពិភពលោក​ដោយ​ឥតគិតថ្លៃ រួមមាន​បន្ទប់​គេង និង​អាហារ ព្រមទាំង​ទទួលបាន​ប្រាក់ឧបត្ថម្ភ​សម្រាប់​ការចិញ្ចឹម​ជីវិត​ផងដែរ។

ដើម្បី​យល់ច្បាស់​ពី​លក្ខខណ្ឌផ្សេងៗ ក្នុងការ​ប្រកួតប្រជែង​យក​អាហារូបករណ៍​នេះ យុវជន​កម្ពុជា​ដែលមាន​ចំណាប់អារម្មណ៍ អាច​ចូលរួម​ក្នុង​សិក្ខាសាលា​មួយ​ដែល​រៀបចំ​ដោយ​ការិយាល័យ​សហប្រតិបត្តិ​ការ​យោធា​សហរដ្ឋអាមេរិក​នៅក្នុង​បរិវេណ​សាកលវិទ្យាល័យ​បញ្ញា​សាស្ត្រ​កម្ពុជា​ខាងត្បូង​វិមានឯករាជ្យ នៅ​ថ្ងៃទី១៦ ខែមិថុនា ខាងមុខនេះ។

សូមបញ្ជាក់ថា រហូតមកដល់​ពេលនេះ មាន​យុវជន​កម្ពុជា ៣ រូប​ហើយ ដែល​បានបញ្ចប់​ការសិក្សា​ជំនាញ​យោធា ពី​សាកលវិទ្យាល័យ United States Military Academy West point ដែល​ក្នុងនោះ​ក៏មាន​កូនប្រុស​ច្បង​របស់​លោកនាយករ​ដ្ឋ​មន្ត្រី ហ៊ុន សែន គឺ លោក ហ៊ុន ម៉ា​ណែ​ត ផងដែរ។ជាមួយគ្នានេះ​ផងដែរ មាន​យុវជន​កម្ពុជា ២ រូប​ទៀត​កំពុង​សិក្សា​ជំនាញ​កងទ័ពជើងទឹក នៅ​ពី​សាកលវិទ្យាល័យ​United States Naval Academy Annapolis ៕