ចោរ​ប្លន់​អ្នកលក់​មាស​ផ្សារ​អ្នក​លឿង​អស់​មាស​១០​តម្លឹង​និង​លុយ​ជាង​៦ពាន់​ដុល្លារ

កណ្តាល ៖ នៅ​ថ្ងៃទី​២៥ ខែឧសភា ឆ្នាំ២០១៥ វេលា​ម៉ោង ១៦និង២០​នាទី ត្រង់​ចំណុច​ផ្លូវលំ ផ្សារ​លើ ក្នុងភូមិ​អំពិល​ទឹក​ឃុំ​កំពង់​ភ្នំ ស្រុក​លើកដែក ខេត្តកណ្ដាល​មាន​អំពើ​ប្លន់​ប្រដាប់​អាវុធ​ទៅលើ​អាជីវករ​លក់​មាស​នៅ​ផ្សារ​អ្នក​លឿង​យក​អស់​មាស​១០​តម្លឹង​និង​លុយ​ដុល្លារ​៤០០០​លុយ​ខ្មែរ​១០លាន​រៀល។

សាក្សី​ឃើញ​ហេតុ​ការណ៍​និយាយ​ថា ជនរងគ្រោះ​ឈ្មោះ​ឆេង ម៉ៅ អាយុ​៥២​ឆ្នាំ ជនជាតិ​ខ្មែរ ទីលំនៅៗ​ភូមិ​ឃុំ​កើតហេតុ​ខាងលើ មុខរបរ អាជីវករ​លក់​មាស ប្ដូរប្រាក់​នៅ​ផ្សារ​អ្នក​លឿង​។

ជនល្មើស​២​នាក់​មិន​ស្គាល់​អត្តសញ្ញាណ ប្រដាប់​ដោយ​អាវុធ​ខ្លី​២​ដើម​ជិះ​ម៉ូតូ​ម៉ាក់វ៉េវ​អាល់​ហ្វា​ពណ៌ ក្រហម គ្មាន​ផ្លាក​លេខ​ចំនួន​០១​គ្រឿង​។ សម្ភារៈ​បាត់បង់​រួមមាន មាស​សរុប​១០​តម្លឹង និង​ប្រាក់​ដុល្លារ​សរុប​ប្រមាណ​៤០០០ដុល្លារ​និង​លុយ​ខ្មែរ សរុប​១០​លាន​រៀល។

សេចក្តី​រាយការណ៍​បាន​ឲ្យ​ដឹង​​ទៀត​ថា​ ជនរងគ្រោះ​បាន​ប្រមូល​សំភារៈ​ដាក់​ក្នុង​កាបូប​រួច​ជិះ​ម៉ូតូឌុប​ចេញពី​ផ្សារ​អ្នក​លឿង​សំដៅ​មក​ផ្ទះ លុះ​មកដល់​ផ្លូវលំ ផ្សារលើ ចុះ​ពី​ផ្លូវជាតិ លេខ​១ ប្រហែល៤០ម៉ែត្រ​សល់​ប្រហែល​៧០ម៉ែត្រ​ដល់​ផ្ទះ ស្រាប់តែ​ឃើញ​ជនសង្ស័យ​២​នាក់​ជិះ​ម៉ូតូ​ដូច​ខាង​លើ មាន​ពាក់មួក កាតឹប​ធម្មតា ពាក់​ម៉ាស់​ទាំង​០២​នាក់ និង​មាន​កាន់​អាវុធ​ខ្លី​នៅ​នឹង​ដៃ​ទាំង​២​នាក់ បាន​ជិះ​ម៉ូតូ​មក​កៀរ​ម៉ូតូ​ជនរងគ្រោះ​ជិះ​ពី​ខាងឆ្វេង​រួច​ភ្ជង់​អ្នក​ម៉ូតូឌុប​ឲ្យ​ឈប់ ភ្លាម​នោះ​ឈ្មោះ​វ៉ន សុផាត ជា​អ្នក​ម៉ូតូឌុប​ឃើញ​ដូច្នេះ ក៏​ផ្ដួល​ម៉ូតូ​រួច​លោត​ចេញពី​ម៉ូតូ ហើយ​ស្រែក​ប្រាប់​គេ​ថា មាន​ចោរប្លន់​បង​ម៉ៅ ហើយ។ ក្នុង​ពេល​នោះ​ដែរ​ជនសង្ស័យ ក៏បាន​ដណ្ដើម​ឆក់​យក​កាបូប​ដាក់​មាស​និង​លុយ​ពី​ជនរងគ្រោះ រួច​ជិះ​ម៉ូតូ​បត់​ក្រោយ​សំដៅ​ឡើង​ថ្នល់ជាតិ​លេខ​១​ ហើយ​ពុំ​ដឹង​ថា ទិសដៅ​ទៅ​ភ្នំពេញ​ឬ ឆ្លងស្ពាន​ទៅ​ខាង ខេត្តព្រៃវែង​ទេ៕