ជប៉ុនកំពុងរងសម្ពាធ ពីអ្នកប្រាជ្ញខ្លួនរឿង ស្ដ្រីបម្រើផ្លូវភេទ ក្នុងសម័យសង្គ្រាម ~ រំភើបចិត្ត

អ្នកប្រាជ្ញប្រវត្ដិសាស្ដ្រជប៉ុនមកពី១៦សមាគម រួមទាំងសាស្ដ្រាចារ្យជាច្រើនរូបផ្សេងទៀតក្នុងប្រទេសជប៉ុន បានចេញសេចក្ដីថ្លែងការណ៍រួមមួយកាលពីថ្ងៃទី២៥ឧសភាម្សិលមិញ ជំរុញឱ្យអ្នកនយោបាយនិងប្រព័ន្ធផ្សព្វផ្សាយជប៉ុន ប្រឈមមុខចំពោះអំពើឃោឃៅរបស់ជប៉ុនក្នុងសម័យសង្គ្រាម។ជាពិសេសគឺក្រុមអ្នកប្រាជ្ញទាំងអស់ចង់ផ្ដោតជាសំខាន់ទៅលើបញ្ហាស្ដ្រីបម្រើផ្លូវភេទក្នុងសម័យសង្គ្រាមលោកលើកទីពីរ ដែលត្រូវជប៉ុនបង្ខំឱ្យទៅធ្វើជាស្រីបនសម្រាប់កងទ័ពខ្លួន។

នៅក្នុងសេចក្ដីថ្លែងការណ៍រួមដែលសមាគមអ្នកប្រាជ្ញបានចេញ បានបង្ហាញថាស្ដ្រីដែលបម្រើផ្លូវភេទសម្រាប់កងទ័ពជប៉ុន គឺជាការជ្រើសរើសតាមការបង្ខិតបង្ខំ មិនមែនជាការស្ម័គ្រចិត្ដទេ ហើយបញ្ហានេះត្រូវបានបង្ហាញក្នុងកំណត់ត្រាប្រវត្ដិសាស្ដ្រជាច្រើន ក៏ដូចជាការស្រាវជ្រាវផងដែរ។ ដោយការបន្ដមិនទទួលខុសត្រូវរឿងពិតនៃទាសករផ្លូវភេទក្នុងសម័យសង្គ្រាមនេះ អ្នកនយោបាយមួយចំនួននិងផ្នែកប្រព័ន្ធផ្សព្វផ្សាយជប៉ុនផង ហាក់បង្ហាញដល់ពិភពលោកថាជប៉ុនមិនបានគោរពសិទ្ធិមនុស្សទេ។ ដូច្នេះទាមទារឱ្យរដ្ឋាភិបាលជប៉ុនស្វែងរកដំណោះស្រាយ តាមភស្ដុតាងប្រវត្ដិសារដែលបានស្រាវជ្រាវ និងការបណ្ដុះបណ្ដាលផ្សេងៗទៀត ដើម្បីចងចាំបញ្ហានេះកុំឱ្យកើតឡើងម្ដងទៀត។

សេចក្ដីថ្លែងការណ៍ខាងលើនេះ បានចេញបន្ទាប់ពីអ្នកប្រាជ្ញជាង៤៥០នាក់មកពីជុំវិញពិភពលោក ចុះហត្ថលេខាលើលិខិតបើកចំហមួយកាលពីសប្ដាហ៍មុន ប្រកាសឱ្យជប៉ុនដោះស្រាយរឿងរ៉ាវក្នុងសង្គ្រាមលោកលើកទីពីរ ទាំងសកម្មភាពនិងពាក្យសម្ដី។នៅក្នុងលិខិតបើកចំហក្រុមអ្នកប្រាជ្ញបាននិយាយដែរថា ការបកស្រាយរឿងប្រវត្ដិសាស្ដ្រគឺជាឧបសគ្គមួយ ដល់ការប្រារព្ធខួប៧០ឆ្នាំនៃការបញ្ចប់សង្គ្រាមលោកលើកទីពីរ និងបន្ថែមទៀតថា ការបដិសេធនិងការមិនទទួលសុខត្រូវលើអតីតស្ដ្រីបម្រើផ្លូវភេទក្នុងសម័យសង្គ្រាម ជារឿងមិនអាចទទួលយកបានឡើយ។

គួររម្លឹកថា យ៉ាងតិចណាស់ស្ដ្រី២សែននាក់ ភាគច្រើនមកពីឧបទ្វីបកូរ៉េ ត្រូវបង្ខំឱ្យធ្វើជាទាសករផ្លូវភេទសម្រាប់កងទ័ពជប៉ុន។ចំនួននេះគិតទាំងមុននិងអំឡុងសង្គ្រាមលោកលើកទីពីរ។ បច្ចុប្បន្នប្រជាជនកូរ៉េក៏មិនទាន់បាត់ចងកំហឹងជាមួយជប៉ុនដែរ ហើយនៅតែទាមទារឱ្យជប៉ុនសុំទោសជាសាធារណៈឱ្យពិភពលោកបានដឹងពីទង្វើឃោឃៅរបស់ខ្លួន៕

ប្រភព៖http://vayofm.com/

ជប៉ុនកំពុងរងសម្ពាធ ពីអ្នកប្រាជ្ញខ្លួនរឿង ស្ដ្រីបម្រើផ្លូវភេទ ក្នុងសម័យសង្គ្រាម

0 comments:

Post a Comment

Search

Popular Post

Introduction

Schedule

Total Vistitors

Visitors Online