តំណាងរាស្រ្តគណបក្សសង្រ្គោះជាតិ លោក អ៊ុំ សំអាន ដែលបានរកឃើញថាមានការបាត់បង់ដីខ្មែរទៅវៀតណាមនៅច្រកតន់ហន់ ខេត្តកំពត ប្រកាសបបួលប្រធានគណៈកម្មាការព្រំដែនកម្ពុជា លោក វ៉ា គឹមហុង ជជែកដេញដោលគ្នាតាមប្រព័ន្ធផ្សព្វផ្សាយ ដើម្បីអាចឲ្យប្រជាពលរដ្ឋវិនិច្ឆ័យថាមួយណាខុសត្រូវ។
លោក អ៊ុំ សំអាន ប្រាប់VODនៅយប់ថ្ងៃអាទិត្យនេះថាក្រោយពីលោក វ៉ា គឹមហុង បានបកស្រាយនៅក្នុងវេទិកាតុមូលដែលរៀបចំដោយទីស្តីការគណៈរដ្ឋមន្រ្តី ប្រជាពលរដ្ឋខ្លះជឿលើការពន្យល់របស់លោក វ៉ា គឹមហុង។ ប៉ុន្តែលោកថាប្រជាពលរដ្ឋមួយចំនួនទៀតក៏ជឿលើការបកស្រាយរបស់លោកផងដែរ។ លោកស្នើឲ្យមានការជជែកដេញដោយគ្នា ដើម្បីឲ្យប្រជាពលរដ្ឋអាចវិនិច្ឆ័យបានដោយខ្លួនឯង។ លោកបញ្ជាក់ថា«យើងចង់ឲ្យមានការសួរដេញដោលគ្នា ដើម្បីអាចឲ្យប្រជាពលរដ្ឋវិនិច្ឆ័យបាន។ ប្រជាពលរដ្ឋពិបាកក្នុងការវិនិច្ឆ័យ។ វប្បធម៌នៃការសួរដេញដោលនេះមាននៅអាមេរិក នៅពេលមានPresidential Campaign(យុទ្ធនាការបោះឆ្នោតជ្រើសរើសប្រធានាធិបតី)។ វាជាវប្បធម៌ល្អក្នុងប្រទេសលទ្ធិប្រជាធិបតេយ្យ»។
លោក អ៊ុំ សំអាន បញ្ជាក់បន្ថែមថា«លោក វ៉ា គឹមហុង ថាការដោះស្រាយបញ្ហាព្រំដែន មិនមែនជាការងាររបស់នីតិបញ្ញត្តិទេ(មានន័យថាកុំឲ្យតំណាងរាស្រ្តលូកដៃ) ប៉ុន្តែគាត់ភ្លេចមើលមាត្រា១២១ ថ្មីនៃរដ្ឋធម្មនុញ ដែលចែងថាសមាជិករាជរដ្ឋាភិបាលទទួលខុសត្រូវចំពោះរដ្ឋសភា»។
លោក អ៊ុំ សំអាន ឲ្យដឹងទៀតថា«លោក ហោ ណាំហុង [រដ្ឋមន្រ្តីក្រសួងការបរទេស] មិនមានជំនាញខាងព្រំដែននោះទេ។ គាត់និយាយរបៀបនយោបាយ។ ដូច្នេះមិនអាចដេញដោលលើបញ្ហានេះបានទេ»។
លោក អ៊ុំ សំអាន ឲ្យដឹងថា លោក វ៉ា គឹមហុង មិនបានយកផែនទីដែលតម្កល់នៅអង្គការសហប្រជាជាតិមកបកស្រាយនោះទេ ដែលនាំឲ្យមានការបញ្ជាក់ថាមិនមានប្រឡាយ៧៩ នៅខេត្តកំពត។ លោកបញ្ជាក់ថា«ព្រោះផែនទីតម្កល់នៅអង្គការសហប្រជាជាតិ ធ្វើនៅឆ្នាំ១៩៥២ ហើយប្រឡាយ៧៩ យួនជីកឆ្នាំ១៩៧៩ ។ ធ្វើម៉េចប្រឡាយ៧៩ ជីក២៧ឆ្នាំក្រោយឆ្នាំ១៩៥២ទៅនៅក្នុងផែនទីធ្វើឆ្នាំ១៩៥២ទៅកើត ដូច្នោះមានតែបំភ្លៃប្រឡាយ៧៩ ទៅផ្លូវលំ»។
លោក អ៊ុំ សំអាន នឹងកោះហៅមន្រ្តីរដ្ឋាភិបាលទាំងពីររូបនោះមកបំភ្លឺ ក្នុងសភាពេញអង្គ ដូចការបំភ្លឺរបស់លោកនាយករដ្ឋមន្រ្តី ហ៊ុន សែន អំពីបញ្ហាព្រំដេន កាលពីឆ្នាំ២០១២។ ប៉ុន្តែលោកថាលោកនឹងទាមទារឲ្យមានការសាកសួរដេញដោលគ្នា។ លោកថានៅសប្តាហ៍ក្រោយ លោកនឹងពិភាក្សាជាមួយតំណាងរាស្រ្តផ្សេងទៀតទៅលើលិខិតដែលលោកគ្រោងដាក់ទៅរដ្ឋសភា។
VODមិនទាន់អាចទាក់ទងលោក វ៉ា គឹមហុង និងលោក ហោ ណាំហុង ភ្លាមៗ ដើម្បីឆ្លើយតបនឹងការអញ្ជើញរបស់លោក អ៊ុំ សំអាន ដើម្បីជជែកតទល់គ្នាបាននៅឡើយទេ។
អានអត្ថបទ....
បើតាមវីដេអូក្លីបនៃវេទិកាតុមូលក្នុងការបកស្រាយបញ្ហាព្រំដែន លោក វ៉ា គឹមហុង បានអំពាវនាវដល់លោក អ៊ុំ សំអាន កុំឲ្យដើរឃោសនាបង្កចលាចលពីបញ្ហាព្រំដែនកម្ពុជា-វៀតណាម ដោយលោកចាត់ទុកថាការអះអាងរបស់នោះភូតកុហក និងបំភ័ន្តមតិអន្តរជាតិ។ លោកបានបញ្ជាក់ថា«យើងខ្ញុំចង់បញ្ជាក់ សូមឲ្យឯកឧត្តមតំណាងរាស្រ្ត អ៊ុំ សំអាន សូមបញ្ឈប់ឃោសនាអកុសលរបៀបនេះទៅ បើសិនគាត់មិនយល់ផែនទីទេ គាត់មិនស្គាល់ផែនទីទេ ឬគាត់មិនមានផែនទីផ្លូវការទេ សូមឲ្យគាត់មកយកផែនទី។ យើងគណៈកម្មការព្រំដែនអត់កំណាញ់ទេ»។
គួរបញ្ជាក់ថា នៅពេលថ្មីៗនេះ លោក អ៊ុំ សំអាន តាមរយៈប្រធានរដ្ឋសភាលោក ហេង សំរិន បានជំរុញឲ្យរដ្ឋាភិបាលបំភ្លឺនូវអ្វីដែលតំណាងរាស្ត្ររូបនោះ អះអាងថាវៀតណាមបានរំកិលព្រំដែនរំលោភចូលដីកម្ពុជា១គីឡូម៉ែត្រក្នុង ខេត្តកំពត ។ លោក ហោ ណាំហុង ថ្មីៗនេះ បានអះអាងថាប្រជាជនខ្មែរនៅភូមិជើង ឃុំជាំ ស្រុកមេមត់ ខេត្តត្បូងឃ្មុំ បានដាំដំណាំចូលទឹកដីវៀតណាម៕
សរសេរមកកាន់លោក ស៊ុន ណារិន តាមរយៈsun_narin@vodhotnews.com
Subscribe to:
Post Comments (Atom)
0 comments:
Post a Comment