ថៃ​សំណូមពរ​យ៉ាង​ប្រថុចញ៉ុច​ឲ្យ​កងទ័ព​អាមេរិក​ដកចេញ​ពី​ភូ​កេ​ត ក្នុង​រង្វង់​ពេល​៥​ថ្ងៃ​

រដ្ឋការ​ក្រុង​បាងកក បាន​សំណូមពរ​ឲ្យ​កងទ័ព និង​យន្តហោះ​របស់​អាមេរិក ចាកចេញ​ផុតពី​ភូ​កេ​ត​ភ្លាមៗ ក្នុង​រង្វង់​ពេល ៥ ថ្ងៃ ទោះបី​មុន​នោះ អាមេរិក​បាន​លើកសំណើរ​ច្រើនលើកច្រើនសារ ពី​ភាពចាំបាច់​នៃ​វត្តមាន​របស់​កងទ័ព​របស់ខ្លួន​ក៏ដោយ ។

​​ប្រភពពី RIA Novosti ថ្ងៃទី​២៤ ឧសភា ដែល​ដកស្រង់​ប្រភពពី Bangkok Post ឲ្យ​ដឹងថា ថៃ​បាន​សំណូមពរ​ឲ្យ​អាមេរិក​ដក​កម្លាំង និង​យន្តហោះ​ទាំងអស់​ចេញផុត​ពី​ភូ​កេ​ត មុន​ថ្ងៃទី​២៩ ឧសភា បន្ទាប់ពី​កងកម្លាំង​នេះ​បានបញ្ចប់​សមយុទ្ធ​សមុទ្រ កាលពី​ថ្ងៃទី​២០ ឧសភា កន្លងមក ។​

​ប្រភពពី​ក្រសួងការពារជាតិ​ថៃ ឲ្យ​ដឹង​បន្ថែមថា ក្រោយពេល​បញ្ចប់​សមយុទ្ធ​រួម​នោះ អាមេរិក​បាន​បញ្ជូន​សំណើរ​ជាច្រើនលើក ទៅកាន់​រដ្ឋការ​យោធា​ថៃ បំណង​រក្សាទុក​កងក​ម្លាំ​ង​ទ័ព និង​យន្តហោះ បន្ត​នៅ​ភូ​កេ​ត ក៏​ដ​ច​ជាការ​ប្រើប្រាស់​ព្រលានយន្តហោះ​លើ​កោះ​នោះ សម្រាប់​ប្រតិបត្តិការ​សប្ប​រសធម៌ សង្គ្រោះ​ដល់​ជនភៀសខ្លួន Rohindzha ចាក​ចេញពី​ភូមា បំណង​មក​រស់នៅ​ប្រទេស​ថៃ ។​

​ការបដិសេធ​នេះ ត្រូវបាន​ចាត់ទុកជា​ប្រតិកម្ម​ខ្លាំងក្លា​បំផុត​មួយ របស់​មូល​មជ្ឈដ្ឋាន​យោធា​ថៃ ក្នុង​បញ្ហា​វិបត្តិ​មនុស្សធម៌ ចំពោះ​ជនភៀសខ្លួន Rohindzha ដែល​ក្នុងនោះ ថៃ​, ម៉ាឡេស៊ី និង​ឥណ្ឌូនេស៊ី កំពុងតែ​ត្រូវ​ប្រឈមមុខ​នឹង​ការស្តីបន្ទោស​ជាច្រើន របស់​សហគមន៍​អន្តរជាតិ ពិសេស​គឺ អាមេរិក ជុំវិញ​បញ្ហា​រុញច្រាន​នាវា​ផ្ទុក​ជនភៀសខ្លួន​ឲ្យ​ចេញពី​ដែនទឹក ទោះបី​ពួកគេ​កំពុងស្ថិត​ក្នុងស្ថានភាព​គួរ​ឲ្យ​អាណោចអាធម្ម​ក្តី ។​

​អង្គការសិទ្ធិមនុស្សរ​បស់ ONU បាន​អំពាវនាវ​ឲ្យ​ប្រទេស​ទាំង​៣​រៀបចំ​យ៉ាង​ឆាប់រហ័ស​នូវ​បណ្តា​សកម្មភាព​រុករក និង​សង្គ្រោះ​បញ្ជូន​នាវា​ទាំងនោះ មកកាន់​ដីគោក ដើម្បី​សុ​វត្តិភាព​សម្រាប់​ជនភៀសខ្លួន ៕