ព្រះសីហនុ ៖ កាលពីវេលាម៉ោង ១៣ និង៤០នាទីថ្ងៃទី២៥ ខែឧសភា ឆ្នាំ២០១៥ មានករណីគ្រោះថ្នាក់ចរាចរណ៍មួយកើតឡើងនៅតាមបណ្តោយផ្លូវជាតិលេខ៤ ត្រង់ចំណុចចន្លោះគីឡូម៉ែត្រលេខ១៣៦–១៣៧ ស្ថិតក្នុងភូមិបឹងត្រាច ឃុំចំការហ្លួង ស្រុកកំពង់សិលា ខេត្តព្រះសីហនុ។
លោកវរសេនីយ៍ត្រី ស៊ីម សុរិទ្ធ ប្រធានស្នាក់ការសន្តិសុខ ៤០២ បានឲ្យដឹងថា មានគ្រោះថ្នាក់ចរាចរណ៍មួយកើតឡើងនៅតាមបណ្តោយផ្លូវជាតិលេខ៤ បង្កឡើងដោយរថយន្តទេសចរជាលក្ខណគ្រួសារ ម៉ាកតាកូម៉ា ពណ៌ខ្មៅ ពាក់ស្លាកលេខសៀមរាប 2B-1196 បើកបរក្នុងទិសដៅមកពីរាជធានីភ្នំពេញ មកកាន់ខេត្តព្រះសីហនុ ដែលមានអ្នករួមដំណើរចំនួន១៨នាក់ មានក្មេង និងមនុស្សចាស់ ប្រុស ស្រី។
រថយន្តរងគ្រោះបើកបរដោយឈ្មោះ ព្រំ ជា ភេទប្រុសអាយុ ៦៣ឆ្នាំ មានទីលំនៅ ភូមិត្បែង ឃុំត្បែង ស្រុកបន្ទាយស្រី ខេត្តសៀមរាប លុះមកដល់ចំណុចកើតហេតុ ជាផ្លូវកោងផង និងមានអាកាសធាតុកំពុងតែមានភ្លៀងធ្លាក់ខ្លាំង ធ្វើឲ្យរថយន្តខាងលើរេចង្កូតក្រឡាប់ចេញពីផ្លូវទៅផ្នែកខាងឆ្វេងដៃ ប្រហែល៣០ម៉ែត្រ ពីចិញ្ចើមផ្លូវជាតិ។
ចំណែកជនរងគ្រោះមានឈ្មោះ តួត អ៊ី ភេទស្រី អាយុ៦៤ឆ្នាំ របួសស្រាល ទី២ ឈ្មោះ សៀង ណាឡា ភេទស្រី អាយុ១៧ឆ្នាំ របួសស្រាល អ្នកទាំងពីរមានទីលំនៅភូមិ ព្រះអង្គធំ ឃុំខ្នងភ្នំ ស្រុកស្វាយលើ ខេត្តសៀមរាប និងទី៣ ឈ្មោះ ឡម ណាវ ភេទស្រី អាយុ ៤០ឆ្នាំ របួសស្រាល មានទីលំនៅភូមិត្បែង ឃុំត្បែង ស្រុកបន្ទាយស្រី ខេត្តសៀមរាប។ អ្នករងរបួសទាំង០៣នាក់ ត្រូវបានកងរាជអាវុធហត្ថស្នាក់ការសន្តិសុខ៤០២ បានជួយសង្គ្រោះ យកទៅកាន់មន្ទីរពេទ្យតក្កវិទ ស្រុកកំពង់សិលា ចំណែករថយន្តរង់ចាំឡានស្ទូចយកទៅជួសជុល៕
Subscribe to:
Post Comments (Atom)
0 comments:
Post a Comment